Prins Remco I
Effe vuuerstèlle:

Miene naam is Remco Coelen, net 40 gewoeare. Ich bèn geboeare in Thoear oppe kruuswaeg bie Thei en Mien en bèn de broor van Sandra.

Zoean 19 jaor geleje höb ich ein sjummerts maedje lieëre kènne genaamdj Veronique, woea ich inmiddels 9 jaor mèt getrouwdj bèn en 2 prachtige kinjer höb. Oos dochter van 8, Naomi en oze kleine batraaf Jelle van 4. Same woeane wae oppe Margarethastraot in Thoear-Noeard woea wae same hoeapelik nog väöl jaore sjoean avonture moge belaeve.

Sinds 2003 wirk ich es bewaegingsagoog in CIRO (baeter bekèndj es ‘t vreugere Hornerheide). Óntzettendj sjoean werk óm same mèt de patiënte eine waeg ómhoeag te vinje middels fysieke en mentale traininge óm de kwaliteit van laeve te bevordere. Dit doon ich nog edere daag mèt väöl plezeer en hoeal hie väöl voldoening oet, same mèt mien collega’s.

Boete mien werk, höb ich ouch nog ein aantal hobby’s: Oppe ieërste plaats is sport mien lust en mien laeve, t’r geit geine daag vuuerbie zónger te sporte. Es bengel van 5 jaor bèn ich begós mèt voetballe bie V.V. Thoear, woea ich de gael zwarte kleure höb gedrage toet en mèt de seniore. Róndj mien 20ste bèn ich get mieër gaon helloupe naeve ’t voetballe, ómdet ich i.v.m. mien werk nog mer eine kieër per waek kós gaon traine. Dao bleek ich get talent vuuer te höbbe mèt ein persuuenlik recor oppe 5km van 16.03 en oppe 10km van 34.10. Door get blessures bèn ich gaon mindere op wedstrijdniveau. De jaore t’rnao haet ‘t wielerhert mich veroverdj toet gepassioneerdj wielertoerist woea ich de tied zeuk óm same met T.W.C. Thoear oppe zóndig km’s inne bein te kriege en ‘t leefst in zuid-Limburg. Heerlijk óm oppe lamborghini mèt 2 rajer in ein bienao feutus haojing de waeg af te raoze en noew plekke en routes te óntdèkke. Inne wintjer is de sjaatspassie ein óngerdeil van mien passie vuuer sport. Same mèt mien vader nao Waalre en op natuuries km’ s make woea allein ‘t geluid van ‘t ies, de sjaats enne natuur te huuere is.

Boete al ‘t sportgeweldj is ein anger hobby de sjötterie. Es kleine bengel ging ich al mèt pap nao de wei en gruudje op van bördjesdrager toet trómmelieër. En ‘t allersjoeanste is de buks. Waat is t’r nog sjoeaner den ‘t bölke zeen verdwiene es de trèkker weurdj uuevergehoealdj (mits t’r raak is 😊). Ein prachtig geveul, ein zeen mèt de buks, ‘t oear t’r tieëge haojendj wannieër de laaj toe geit, de damp oet de luip te zeen kómme naodet de kogel vertrokke is.

Verder ómdet ich toch tied uuever höb, zeen ich de doeve (lochkippe) vlege boeave ‘t hoes en aaf en toe pik ich ein wedstrijdje mèt wannieër dit gezinstechnisch kan.

Ouch op vakansie gaon doon ich óntzettendj gaer. Same mèt Veronique enne kids nao de berg in Oeasteriek, Frankriek of Italië. Heerlijk genete van biezunjere momente same.

Inne weekende kieke wae dèk same nao de voetbalwedstrijde van Ajax. ‘t Roead-wit blood stroumtj den door oos aore. En zelfs Veronique is van ein Roda JC shirt verangerdj nao ‘t AFC Ajax.

De vrinj zeen ouch ein belangriek óngerdeil in mien laeve. Same leef en leid deile en sjoean momente make. Sjaele zeiver huuertj dao uiteraard ouch bie, ónger ‘t genot van ein lekker kaod pilske. Mèt vastelaovendj  zeen wae den ouch dèk same es vastelaovesgroep “De Hermans” en doon den gaer sjoenkele, eine polonaise loupe of roeje, ‘t kan neet gek genóg. Want gelök is ‘t enige waat zich verdöbbeltj, esse ‘t deils (baeter good gejatj, den zelf verzónne)

Zoea noe höb ich waal genóg vertèldj uuever michzelf en stèl ich gaer mien gevolg nog effekes aan uch vuuer.

Miene ieërste Adjudant is Wibaut Hawinkels, ouch waal bekèndj es “Wiep”. Hae is 48 jaor jónk, haet weinig haor oppe kop en weugtj meistal tösse de 81 kilo inne zomer en 95 kilo inne wintjer. Hae is eine maeter 76 klein en det kumptj vuueral ómdet zien bein ane boeavekantj get kort zeen. Hae woeantj same mèt zien maedje Carolien, ouch waal bekèndj es “Karel” oppe Wilhelminalaan in Thoear. Same höbbe se twieë dochters, Richa van 19 en Mijke van 16 jaor. Ouch hae zitj dèk same mèt mich oppe fiets, óm gans Limburg ónveilig te make en zörgtj bie “de Gasuni” det de meiste van uch ’t lekker werm höbbe inne wintjer.

Miene twieëdje Adjudant is Dirk Gijsen. Hae woeantj op ’t Linjepaad in Thoear en hoeaptj bènnekort 45 jaor te waere. Hae woeantj same mèt Carmen en is hieël gruuets op zien beide kinjer Lize en Jur. In ziene vrieje tied is t’r op ’t voetbalveldj te vinje es trainer vanne maedjes ónger 13. Daonaeve fietstj t’r hieël gaer mèt zien maote van T.W.C. Thoear (det zeen die gekke die altied midde oppe waeg rieje).       Hae wirktj bie “Blomix BV” in Brunssum woea hae verantjwoeardelik is vuuer de planning enne aansturing vanne productie. Mer al dees activiteite waere op ein lieëg pitje gezatte es vastelaovendj t’r aan kumtj. Want den gaon ouch bie hum alle remme los.

Miene derdje Adjudant is Jos Nevels. Hae is 45 jaor en woeantj same mèt zien vrouw Vivian oppe Ansfriedstraot in Thoear. Hae is trotse vader van ziene zoon Jeugdprins Tim III en dochter Liene. In ziene vrieje tied is ouch hae te vinje op ’t voetbalveldj es trainer van ’t sterreteam vanne maedjes ónger 13. En ouch hae luuetj net es ich de doeve (lochkippe) gaer vlege en piktj regelmaotig ein wedstrijdje mèt. Hae is wirkzaam bie “Maasvesteberbenbouw” en is dao oetveurder inne verduurzaming.

Same mèt uch, leef Geitebuk en Geitebukskes gaon wae t’r eine geweldige vastelaovendj van make, ónger mien motto:

“Beer inne benj, locht inne vaere, laot mich mer gewaere!”

Schlager 2024

Jeugdprins Tim III & Jeugdprinses Eline I
Effe vuuerstèlle:

Waat ein groeate ieër, det wae ós moge vuuerstèlle es Jeugdprinsepaar vanne Geitebukskes.

Ich bèn Tim Nevels, 13 jaor aod, zoon van aod Prins Jos de II en van Vivian, die kèntj gae messjien vanne jeugdbegeleiding. Groeate broor van Liene, die net es ich bie de jeugdraod zitj. Allemaol ein óngerdeil vanne vastelaovesvereniging en ouch nog van de Hermans familie, dus det ‘t mich mèt de paplieëpel is ingegaeve det snaptj gae waal. Det miene groeate wins en droum noe oet moog kómme vinj ich hieëlemaol te gek. Boete de vastelaovendj bèn ich drök mèt voetballe bie FC Maasgouw JO14 en trómme en sjete bie de sjötterie. Verder bèn ich väöl boete en game ich gaer mèt vrinj. Óm mien waek verder óm te kriege, gaon ich nao Ursula, woea ich inne brugklas zit.

En ich bèn Eline en vinj ’t ein ieër óm eug Jeugdprinses te zeen. Ich kan uch vertèlle det mien sprookje noe echt is oetgekómme! Ich bèn gezaegendj mèt ouders die de meist fantastische kuueninklijke raodgaevers zeen, Raymond en Nathalie, en höb ‘t gelök óm de kleine zus te zeen van Lucas, Jasper en Xander, die mich altied laote straole es ein ware prinses. Al bienao 13 jaor lank höb ich mèt leefdje mien rol es prinses bie ós thoes vervöldj, en noe, mèt trots, moog ich deze prinsessentitel drage in ‘t sjitterendje riek vanne Geitebukskes. Ich fiets dagelijks nao Häör, woea ich oppe brugklas zit. ‘t Is altied ein avontuur oppe fiets, mer ich gaon mèt plezeer nao sjoeal. En es ich neet op sjoeal bèn, vind se mich dèk inne kuueke, woea ich gaer get lekkers bak. Shoppe is ouch ein van mien favoriete bezigheje, vuueral mèt mien nichje Vivian. En es gae wiltj weite woeadet gae mich kèntj vinje, den is “de Kruidvat” miene absolute lievelingswinkel vuuer spulkes vuuer de nieëgel of get make-up.

Zoea noe höbbe wae genóg vertèldj uuever ós zelf en stèlle wae uch gaer vuuer aan oos Adjudante:

Oze ieërste Adjudant is Daan van den Ende en hae is 14 jaor aod. Zien aojers zeen John v.d. Ende en Nelly v. Abswoude en zien aojere broor is Lars. Hae zitj sinds kort oppe “Buso” St. Jansberg in Maaseik. Zien hobby’s zeen voetballe, Vèsse, Game, boete spuuele enne sjötterie. En hae vindj ’t hieël TOF, det t’r weer is gevraogdj es Adjudant, noe van Jeugdprins Tim III.

Oos twieëdje Adjudante is Lize Gijsen en zie is 11 jaor. Häör aojers zeen Dirk en Carmen en häör jóngere breurke is Jur. Zie zitj in groep 8 vanne basissjoeal en geit volgendj jaor nao “Sint Ursula” in Häör. Häör hobby’s zeen voetballe en natuurlijk vastelaovendj vere. Zie vindj ‘t ein hieële ieër óm Adjudante van Jeugdprinses Eline te zeen. En ‘t liektj häör natuurlijk ouch geweldig óm zelf oeat Jeugdprinses te waere.

Same mèt oos Adjudante Daan en Lize, de Jeugdraod en natuurlik Groeate Prins Remco I en zien Adjudante Wibaut, Dirk en Jos en hieël Thoear gaon wae der eine ónvergaetelikke vastelaovendj van make, ónger oos motto:

“Sprookjes die bestaon, vastelaovendj laot gaon!”

Schlager 2024

Te koup

Te koup vastelaovesvlag vanne Geitebuk 20 euro
Mail nao info@degeitebuk.nl